IRAYAM

ക്വിയർ സംസ്കാരത്തിന്റെ ആവിഷ്കാരവും പ്രതിനിധാനവും ആദ്യകാലമലയാളസാഹിത്യത്തിൽ: തിരഞ്ഞെടുത്ത പാഠങ്ങളെ മുൻനിർത്തിയുള്ള പഠനം

അനസ് എൻ.എസ്. — 2024-12-30

ലൈംഗികത, ജെൻഡർ, പ്രണയം തുടങ്ങിയവയെ വിപരീത-ദ്വന്ദ്വയുക്തിയിൽ (Opposite Binary Logic) ആവിഷ്കരിക്കുന്ന കഥാസന്ദർഭങ്ങളിൽ നിന്ന് വ്യത്യസ്തമായി ദ്വന്ദ്വാതീത-ദ്രവ്യ-വർണരാജി (Non Binary-Fluid-Spectrum) തലങ്ങളിൽ സമീപിക്കുന്ന രചനകളുടെ പ്രാഗ്രൂപം ആദ്യകാലമലയാളസാഹിത്യത്തില്‍ തന്നെ പ്രത്യക്ഷപ്പെട്ടിരുന്നുവെന്ന് സ്ഥാപിക്കാനാണ് ഈ പ്രബന്ധം ശ്രമിക്കുന്നത്. 1947ൽ വൈക്കം മുഹമ്മദ്‌ ബഷീർ രചിച്ച ശബ്ദങ്ങൾ എന്ന നോവലിനെയും 1954-ൽ പെരുന്നയിൽ ജോസഫ് രചിച്ച ജീവിതത്തിലെ ഒരു താള് എന്ന ചെറുകഥയെയുമാണ് ഇതിൽ സവിശേഷപഠനത്തിനായി സ്വീകരിച്ചിരിക്കുന്നത്. ക്വിയർജീവിതങ്ങളെ (Queer Lives) വ്യക്തിപരതയിൽ നിന്ന് വ്യത്യസ്തമായി ഒരു സമുദായത്തിന്റെ (Community) ഭാഗമായി കാണാൻ ആദ്യകാലമലയാളസാഹിത്യം ശ്രമിച്ചതെങ്ങനെയെന്ന് ഈ പ്രബന്ധം പരിശോധിക്കുന്നു. പാഠവിശകലനം (Textual Analysis) എന്ന രീതിശാസ്ത്രമുപയോഗിക്കുന്ന ഈ പഠനത്തിൽ വിവിധ ക്വിയർ സിദ്ധാന്തങ്ങളുടെ സൈദ്ധാന്തികചട്ടകൂടുപയോഗിക്കുന്നു. ക്വിയർ ജീവിതങ്ങളെ ആഖ്യാനം ചെയ്യുമ്പോൾ ആദ്യകാലസാഹിത്യം സ്വീകരിച്ച മനോഭാവങ്ങളെ വെളിപ്പെടുത്താനും ഈ പ്രബന്ധം ഉദ്ദേശിക്കുന്നു.

അധീശവർഗ്ഗ പൊതുബോധവും സ്ത്രീസ്വത്വ നിർമ്മിതിയും; ഉണ്ണികൃഷ്ണൻ പുതൂരിന്റെ 'അമൃതമഥനം ' ഒരു സാംസ്കാരിക വായന

സഞ്ജന പി.എസ് — 2024-12-30

കേരളത്തിൽ നിലനിന്നിരുന്ന ജാതിപരവും വർഗ്ഗപരവുമായ പല അസമത്വങ്ങൾക്കും വിരാമമിടാൻ നവോത്ഥാന സമരങ്ങൾക്ക് കഴിഞ്ഞു എന്ന് അവകാശപ്പെടുമ്പോഴും പൂർണ്ണമായും അത് സാധ്യമായോ എന്നത് ചിന്തനീയമാണ് .സമകാലിക കേരളം സാക്ഷ്യം വഹിക്കുന്ന പല സംഭവങ്ങളും വ്യക്തമാക്കുന്നത് കേരളീയ ജനത പഴയകാലത്തേക്കുള്ള ഒരു മടക്കയാത്രയിലാണ് എന്നാണ് .ഇത് സമൂഹത്തിന് വളരെയേറെ ദോഷകരമാണ് എന്നതിൽ സംശയമില്ല .അജ്ഞരായ ജനതയ്ക്കുമേൽ ആദ്യകാലത്ത് അധീശവർഗ്ഗം എങ്ങനെയാണോ അവരുടെ ധാരണകളെ അടിച്ചേൽപ്പിച്ചിരുന്നത് അതിനു സമാന രീതിയിൽ ഇന്നും സമൂഹത്തിനുമേൽ ചില പൊതുബോധങ്ങൾ പ്രവർത്തിച്ചുവരുന്നു .ഇത്തരത്തിലുള്ള ചില പൊതുബോധങ്ങൾ ആണ് ഈ കാലഘട്ടത്തിലും സ്ത്രീയ്ക്ക് പരിധികളും പരിമിതികളും നിശ്ചയിക്കുന്നത്. ചരിത്രത്തിലേതുപോലെ ഇന്നും പുതിയ രീതിയിൽ സമൂഹത്തിനു മേൽ ഇത് പ്രവർത്തിക്കുന്നു.ഉണ്ണികൃഷ്ണൻ പുതൂർ 1981ൽ രചിച്ച അമൃതമഥനം എന്ന നോവലാണ് ഇവിടെ പഠന വിധേയമാക്കുന്നത്.

ട്രാൻസ്ജന്റർ സ്വത്വപ്രതിസന്ധികളും അതിജീവനവും: തെരഞ്ഞെടുത്ത ആത്മാഖ്യാനങ്ങൾ മുൻനിറുത്തിയുള്ള പഠനം

അശ്വതി കെ — 2024-12-30

പുരുഷൻ, സ്ത്രീ എന്നിങ്ങനെ മാത്രം ലിംഗവിഭാഗങ്ങളെ അംഗീകരിച്ചു പോന്നിരുന്ന പൊതുസമൂഹത്തിൽ നിരവധി അവകാശപ്പോരാട്ടങ്ങളിലൂടെയാണ് ഭിന്നലിംഗക്കാരായ മനുഷ്യർ തങ്ങളുടെ ഇടം കണ്ടെത്തിയത്. ട്രാൻസ്ജന്ററുകൾ ഉൾപ്പെടെയുള്ള ലൈംഗികന്യൂനപക്ഷങ്ങൾ ഇന്നും മുഖ്യധാരയിൽ നിന്നും മാറ്റിനിർത്തപ്പെടുന്നു. അരികുവത്കരിക്കരിക്കപ്പെടുന്ന മനുഷ്യരുടെ ജീവിതം ആവിഷ്കരിക്കപ്പെടുന്നു എന്നത് ഇരുപത്തിയൊന്നാം നൂറ്റാണ്ടിൽ ആത്മകഥാസാഹിത്യത്തിലുണ്ടായ വലിയ മാറ്റമാണ്. കേട്ടെഴുത്തുജീവിതം എന്ന പുതുശാഖയിലൂടെ പാർശ്വവത്കൃതർക്കും സ്വന്തം നിലയിൽ ജീവിതാഖ്യാനം സാധ്യമാകാത്തവർക്കും തങ്ങളുടെ ജീവിതം അടയാളപ്പെടുത്തുവാനായി. നിരവധി ട്രാൻസ്ജെന്ററുകളുടെ ജീവിതം ഇത്തരത്തിൽ പുറത്തുവന്നിട്ടുണ്ട്. "ഒരു മലയാളി ഹിജഡയുടെ ആത്മകഥ" (ജെറീന), അവളിലേക്കുള്ള ദൂരം (സൂര്യ ഇഷാൻ) എന്നീ കൃതികളെ ആധാരമാക്കിക്കൊണ്ട് ട്രാൻസ്ജന്റർ ആത്മാഖ്യാനങ്ങളിലെ സ്വത്വപ്രതിസന്ധികളും അതിജീവനമാർഗങ്ങളും വിശകലനം ചെയ്യാനാണ് പ്രബന്ധത്തിലൂടെ ഉദ്ദേശിക്കുന്നത്. സ്വത്വബോധത്തിലൂടെ അവർ ജീവിതത്തിന്റെ പ്രതിരോധം സാധ്യമാക്കിയത് എങ്ങനെയെന്നും അന്വേഷിക്കാൻ ശ്രമിക്കുന്നു.

ലിംഗഭേദവും ഭിന്നശേഷിത്വവും- അരികുവൽക്കരണത്തിന്റെ അനുഭവങ്ങളെ അടിസ്ഥാനമാക്കിയുള്ള പഠനം

ഹീര. വി. എസ് — 2024-12-30

നിലവിലെ ഭിന്നശേഷി അവകാശ നിയമപ്രകാരം 21 തരം ഭിന്നശേഷി വിഭാഗങ്ങളാണുള്ളത്. അതിൽ കാഴ്ചാപരിമിതി നേരിടുന്നവരുടെ അനുഭവങ്ങളെ അടിസ്ഥാനമാക്കിയാണ് ഈ പഠനം തയാറാക്കിയിട്ടുള്ളത്. കാഴ്ചയുടെ പരിമിതികൾ അനുഭവിക്കുന്നവരുടെ അനുഭവങ്ങളെക്കുറിച്ച് പഠിക്കുമ്പോൾ ലിംഗഭേദം എന്ന രാഷ്ട്രീയ സംവർഗം പ്രധാനമാകുന്നു. എന്ന പരികല്പയിലാണ് ഈ പഠനം നടക്കുന്നത്. ആണധികാരസമൂഹത്തിൽ ഭിന്നശേഷിയിൽപെടുന്നവർ അനുഭവിക്കുന്ന വിവേചനങ്ങളെ വിശകലനം ചെയ്തുകൊണ്ടാണ് ഈ പ്രബന്ധം തയാറാക്കിയിരിക്കുന്നത്.

ആദ്യഭാഗത്ത് ഭിന്നശേഷിത്വത്തെകുറിച്ചും അവരുടെ അവകാശങ്ങളെക്കുറിച്ചും സാമാന്യമായി വിശദീകരിക്കുന്നു. കാഴ്ചാപരിമിതരുടെ പ്രശ്നങ്ങളും ജീവിതസാഹചര്യങ്ങളുമാണ് പഠനത്തിന്റെ പ്രഥമാകരം. വിദ്യാഭ്യാസം, തൊഴിൽ, കുടുംബം തുടങ്ങിയ വ്യവഹാരങ്ങളിൽ കാഴ്ചാപരിമിതരായവർ പ്രത്യേകിച്ച് സ്ത്രീകൾ വിവേചനം അനുഭവിക്കുന്നതെങ്ങനെ എന്ന് കണ്ടെത്താനാണ് ശ്രമിക്കുന്നത്. ആണധികാരപ്രത്യയശാസ്ത്രം ഈ വ്യവഹാരങ്ങളിലെ കാഴ്ചാപരിമിതരുടെ അനുഭവത്തെ നിർണയിക്കുന്നതെങ്ങനെ എന്നാണ് ഈ പ്രബന്ധത്തിൽ പരിശോധിക്കുന്നത്. വ്യക്തിപരവും സാമൂഹികവുമായ ജീവിതത്തെ പരിവർത്തനപ്പെടുത്തുന്നതിൽ ഉൾച്ചേർക്കൽ വിദ്യാഭ്യാസം ചെലുത്തിയ സ്വാധീനത്തെക്കൂടി ഇതിൽ പരിഗണിക്കുന്നുണ്ട്.

തീരദേശ ജനതയുടെ ദൃശ്യത : മലയാള സിനിമകളിലെ ഇടത്തെ മുന്‍നിര്‍ത്തിയുള്ള പഠനം

സ്വേജ് എസ്. — 2024-12-30

സ്ഥലത്തിലും കാലത്തിലും അടിസ്ഥാനമാക്കിയ കലാരൂപമാണ് ചലച്ചിത്രം. ചലച്ചിത്രത്തിലെ ഇടം ഒരു സാമൂഹിക നിർമ്മിതിയായി കണക്കാക്കുന്നു.സാംസ്കാരിക ഭൂമിശാസ്ത്രം മുൻനിർത്തി ഭൂമിശാസ്ത്രപരമായ അറിവുകൾ ഉപകരണമാക്കി ചലച്ചിത്രത്തെ പഠിക്കുവാന്‍ വേണ്ടി സാധിക്കും.കടൽ ആസ്പദമാക്കി ചിത്രീകരിച്ച തിരഞ്ഞെടുത്ത മലയാള സിനിമകളിലെ ഇടത്തെ അടിസ്ഥാനമാക്കി ജനജീവിതത്തെ മനസ്സിലാക്കാൻ വേണ്ടി കഴിയുന്നതാണ്. മലയാള സിനിമയിലെ തീരദേശ ജനതയുടെ ദൃശ്യത എങ്ങനെയുള്ളതാണെന്ന് ഈ പ്രബന്ധം അന്വേഷിക്കുന്നു. സാമൂഹികവും സാംസ്കാരികവുമായ ഘടകങ്ങളെ ഉപയോഗിച്ചുകൊണ്ട് തീരദേശ ജനതയെ വിശകലനം ചെയ്യുന്നു. മലയാള സിനിമയിൽ തീരദേശ ജനതയെ അപരിഷ്കൃതരും പിന്നോക്ക വിഭാഗവുമായാണോ ചിത്രീകരിച്ചിട്ടുള്ളതെന്ന് ഈ പ്രബന്ധം അന്വേഷിക്കുന്നു. കഥയുടെ ആഖ്യാനത്തിൽ തീരദേശ ജനതയുടെ പ്രാധാന്യം, തൊഴിൽ,ലിംഗം, താമസസ്ഥലം, മതം തുടങ്ങിയവ അപഗ്രഥിക്കുകയാണ് ഈ പ്രബന്ധത്തിൽ ചെയ്യുന്നത്. തീരദേശത്തെ ആസ്പദമാക്കി ചിത്രീകരിച്ച മാലിക്ക് (2021), തുറമുഖം (2023), കൊണ്ടല്‍ (2024) എന്നീ ചലച്ചിത്രങ്ങളെയാണ് പഠനത്തിനു വേണ്ടി തിരഞ്ഞെടുത്തിട്ടുള്ളത്.

കേരളീയ ആധുനികതയുടെ സംവാദപരിസരവും കഥാപ്രസംഗകലയും : ജനകീയ അരങ്ങിന്റെ വികാസം മുൻനിർത്തിയുള്ള വായന ല

ലക്ഷ്മി ശിവൻ — 2024-12-30

പല മാനങ്ങളിലുള്ള ആശയധാരകളുടെ സാകല്യതയിലാണ് ആധുനികത രൂപം കൊള്ളുന്നത്. വ്യതിരിക്തമായ അന്വേഷണങ്ങളുടെ സംവാദസാധ്യതകളെ സാംസ്കാരികചരിത്ര ആലോചനകൾ മുന്നോട്ടുവെയ്ക്കുന്നു. ഇത്തരത്തിൽ പുതിയ ബോധ്യങ്ങളിലേക്ക് മലയാളിയുടെ ജീവിത പരിസരങ്ങളെ പുതുക്കി നിർമ്മിക്കുന്നതിൽ ഇടപെട്ട ഒട്ടനേകം വ്യവഹാരങ്ങളുണ്ട്. ജനാധിപത്യപരമായ സാമൂഹിക ഘടനയ്ക്കു വേണ്ടിയുള്ള സാംസ്കാരിക ഇടപെടലുകളിൽ കലാരംഗത്തെ പരിവർത്തനോന്മുഖമായ സമീപനങ്ങൾ സവിശേഷ പ്രാധാന്യമർഹിക്കുന്നു. വൈവിദ്ധ്യത്തിലൂന്നിയ സാംസ്കാരിക അനുഭവങ്ങളെ അക്കാദമിക അന്വേഷണങ്ങളിലൂടെ ക്രോഡീകരിക്കുന്നതിൽ അദൃശ്യ ചരിത്രത്തിന്റെ പ്രശ്നവത്കരണത്തിലേയ്ക്കുള്ള രാഷ്ട്രീയ മാനങ്ങളുണ്ട്. പാർശ്വസ്ഥമായ ജീവിതാവസ്ഥകളെ അഭിസംബോധന ചെയ്യുകയും സർഗ്ഗാത്മക ബദൽ എന്ന നിലയിൽ കലാപരമായ ഒരു പ്രകടന രൂപത്തെ ചിട്ടപ്പെടുത്തുകയും ചെയ്ത കേരളീയമായ നവോത്ഥാന പരിശ്രമങ്ങളുടെ ഉല്പന്നമാണ് കഥാപ്രസംഗംകല. സാംസ്കാരികവും സാമൂഹികവുമായ അനവധി ഘടകങ്ങളുടെ കലർപ്പിൽ രൂപപ്പെട്ട കേരളീയ ആധുനികതയുടെ സംവാദ പരിസരത്തിൽ കഥാപ്രസംഗകലയിലൂടെ സാധ്യമായ അരങ്ങിന്റെ സാംസ്കാരിക വിനിമയത്തെയും ജനാധിപത്യസങ്കല്പങ്ങളെയും ഈ പ്രബന്ധം വിശകലനത്തിന് ആധാരമാക്കുന്നു.

സമൂഹത്തെ ചലനാത്മകമാക്കിയ ജനകീയ കലാപശ്ചാത്തലത്തിൽ വികസിച്ച കലാരൂപമായതു കൊണ്ടു തന്നെ കഥാപ്രസംഗം മുന്നോട്ടു വച്ച അരങ്ങു സങ്കല്പത്തെ സോവിയറ്റ് കലാ സൈദ്ധാന്തികനായ മിഖായേൽ ബക്തിന്റെ ‘കാർണിവൽ ‘ എന്ന സങ്കല്പനത്തെ അടിസ്ഥാനമാക്കിയാണ് പഠിക്കുന്നത്. ആമുഖവും ഉപദർശനം കൂടാതെ മൂന്ന് ഉപശീർഷകങ്ങളിലൂടെയാണ് പ്രബന്ധം വികസിക്കുന്നത്. ആദ്യ ഭാഗത്ത് കേരളീയ ആധുനികതയുടെ പശ്ചാത്തലത്തെ മുൻ നിർത്തി ജനകീയ അരങ്ങ് എന്ന ആശയത്തെ സമീപിക്കുന്ന ഒന്നാമത്തെ ഉപശീർഷകവും, കാർണിവൽ സങ്കല്പനത്തെ കഥാപ്രസംഗത്തിന്റെ അരങ്ങുമായി ചേർത്തു വായിക്കുന്ന രണ്ടാമത്തെ ഉപശീർഷകവും കഥാപ്രസംഗകല മുന്നോട്ടു വെച്ച അരങ്ങിന്റെ ജനകീയവത്കരണ പ്രക്രിയയുടെ വിശകലനം നടത്തുന്ന മൂന്നാമത്തെ ഉപശീർഷകവും ഉൾകൊള്ളുന്നു.

ക്രമാനുഗതപൂർവപഠനപരിശോധനയും മലയാളഗവേഷണങ്ങളുടെ സമകാലികാവസ്ഥയും - ഒരു വിശകലനം

ഡോ.തനുജ ജി. — 2024-12-30

മലയാള ഗവേഷണങ്ങളിലെ പൂർവ്വപഠനപരിശോധനയുടെ (Literature Review) സമകാലികാവസ്ഥയെ വിമർശനാത്മകമായി വിലയിരുത്തുകയും, ക്രമാനുഗതപൂർവപഠനപരിശോധനയുടെ (Systematic Review of Literature - SLR) പ്രാധാന്യം വ്യക്തമാക്കുകയും ചെയ്യുന്നു. ഏതൊരു ഗവേഷണത്തിന്റെയും ദിശയും ഗുണവും നിർണ്ണയിക്കുന്ന അടിസ്ഥാന പ്രവർത്തനമാണ് പൂർവ്വപഠനപരിശോധനയെങ്കിലും , മലയാളത്തിലെ പല ഗവേഷണ പ്രബന്ധങ്ങളിലും ഇത് ശുഷ്കമായ ക്രോഡീകരണമോ നീണ്ട വിവരണമോ ആയി ഒതുങ്ങിപ്പോകുന്നു എന്ന് ലേഖിക വാദിക്കുന്നു. നിലവിലുള്ള പഠനങ്ങളിലെ വിടവുകൾ കണ്ടെത്തുക , ഗവേഷണ ചോദ്യങ്ങൾ രൂപീകരിക്കുക , സൈദ്ധാന്തിക അടിത്തറ ഉറപ്പിക്കുക എന്നിവയാണ് പൂർവ്വപഠനപരിശോധനയുടെ പ്രധാന ലക്ഷ്യങ്ങൾ. ലേഖിക തിരഞ്ഞെടുത്ത അഞ്ച് ഗവേഷണപ്രബന്ധങ്ങളെ വിശകലനം ചെയ്തുകൊണ്ട്, ചില പ്രബന്ധങ്ങളിലെ പൂർവ്വപഠനപരിശോധന കേവലം ഗ്രന്ഥസൂചിയുടെ സ്വഭാവം മാത്രം പുലർത്തുമ്പോൾ , മറ്റു ചിലത് മുൻകാല പഠനങ്ങളെ വിമർശനാത്മകമായി സമീപിക്കുകയും പുതിയ നിരീക്ഷണങ്ങൾക്ക് അടിത്തറയിടുകയും ചെയ്യുന്നതായി ചൂണ്ടിക്കാണിക്കുന്നു. പക്ഷപാതരഹിതവും ശാസ്ത്രീയവുമായ രീതിശാസ്ത്രം പിന്തുടരുന്ന ക്രമാനുഗതപഠനപരിശോധന (SLR) എന്ന സാധ്യതയെ മലയാള ഗവേഷകർ കൂടുതൽ ഗൗരവത്തോടെ സമീപിക്കണമെന്നും, എങ്കിൽ മാത്രമേ ഗവേഷണങ്ങൾക്ക് ആധികാരികത കൈവരുകയുള്ളൂവെന്നും ലേഖനം സമർത്ഥിക്കുന്നു

മുസ്‍ലിം പ്രതിനിധാനത്തിന്റെ മതേതരവഴികൾ (‘സൂസന്നയുടെ ഗ്രന്ഥപ്പുര’യെ മുൻനിർത്തിയുള്ള പഠനം)

സബ്‍ന കെ — 2024-12-30

അജയ് പി. മങ്ങാട്ടിന്റെ ‘സൂസന്നയുടെ ഗ്രന്ഥപ്പുര’ എന്ന നോവലിനെ മുൻനിർത്തി മലയാള സാഹിത്യത്തിലെ മുസ്ലിം പ്രതിനിധാനത്തിന്റെ മതേതര വഴികൾ പരിശോധിക്കുന്നു. ദുഷ്ടരും പരിഹാസ്യരുമായി മുസ്ലീങ്ങളെ ചിത്രീകരിച്ചിരുന്ന മലയാള നോവലിന്റെ ചരിത്രത്തിൽ നിന്ന് വ്യത്യസ്തമായി, മതപരമായ പ്രതിനിധാനങ്ങൾക്കപ്പുറം സർഗ്ഗാത്മകവും മതേതരവുമായ ജീവിതം നയിക്കുന്ന ഒരുപറ്റം മുസ്ലിം കഥാപാത്രങ്ങളെയാണ് ഈ നോവൽ അവതരിപ്പിക്കുന്നത് എന്ന് ലേഖനം വാദിക്കുന്നു. നോവലിലെ പ്രധാന കഥാപാത്രങ്ങളായ അലി, ഫാത്തിമ, ഇക്ബാൽ തുടങ്ങിയവർ സാഹിത്യവും സംഗീതവും സ്നേഹവും നിറഞ്ഞ, മതത്തിന്റെ ചട്ടക്കൂടുകൾക്ക് പുറത്തുള്ള ഒരു ലോകത്താണ് ജീവിക്കുന്നത്. ആചാരങ്ങളെ നിരാകരിക്കുന്ന ജലാലുദ്ധീൻ റൂമിയുടെ സൂഫി ദർശനങ്ങളാണ് ഈ മതേതര ജീവിതത്തിന് ആത്മീയമായ അടിത്തറ നൽകുന്നത്. ഇതിനു വിപരീതമായി, ഫാത്തിമയുടെ പിതാവിനെപ്പോലുള്ള യാഥാസ്ഥിതിക മതവിശ്വാസികളുടെ ജീവിതം വരണ്ടതും ഒറ്റപ്പെട്ടതുമായി നോവൽ ചിത്രീകരിക്കുന്നു. മലയാള സാഹിത്യത്തിൽ അതുവരെ അധികം ഇടംപിടിക്കാതിരുന്ന ‘മതേതര മുസ്ലിം’ ജീവിതത്തെ കൃത്യമായി അടയാളപ്പെടുത്തുന്നതിലൂടെ, മുസ്ലിം പ്രതിനിധാനത്തിലെ പതിവ് മാതൃകകളെ ഈ നോവൽ പൊളിച്ചെഴുതുന്നു

കോളനിയനന്തരകാലത്തെ അധിനിവേശങ്ങളും സാമൂഹികബലതന്ത്രങ്ങളും: യന്ത്രലോചനം, ചുവന്ന ബാഡ്ജ് എന്നീ നോവലുകളെ മുൻനിർത്തിയുള്ള വിശകലനം

ഐശ്വര്യ എസ് മേനോൻ — 2024-12-30

കോളനിയനന്തരകാലം മുതൽ അധിനിവേശത്തിന്റെ വ്യത്യസ്തമായ ബലതന്ത്രങ്ങളാണ് പൗരസമൂഹത്തെ നിയന്ത്രിച്ചിട്ടുള്ളത്.സാംസ്കാരികമോ പാരിസ്ഥിതികമോ മതാധികാരപരമോ ആയ അധീശത്വത്തിൽ ഭരണകൂടം എങ്ങനെയാണ് സ്വാധീനിക്കുന്നതെന്നും അധിനിവേശം നേരിടുന്ന പൗരസമൂഹം എത്തരത്തിലാണ് സമകാല ഫിക്ഷനിൽ ആവിഷ്കൃതമാവുന്നതെന്നും വിശകലനം ചെയ്യുന്നതാണ് ഈ പ്രബന്ധം.സുസ്മേഷ് ചന്ത്രോത്തിന്റെ യന്ത്രലോചനം, രാജേഷ് ആർ വർമ്മയുടെ ചുവന്ന ബാഡ്ജ് എന്നീ നോവലുകളെ മുൻനിർത്തിയാണ് പഠനം നടത്തുന്നത്.യന്ത്രലോചനത്തിൽ സാംസ്കാരികമായ അധിനിവേശം വിഷയമാകുമ്പോൾ ചുവന്ന ബാഡ്ജിൽ മതാധിനിവേശമാണ് കാണുന്നത്.രണ്ട് നോവലുകളിലും വെളിവാകുന്ന വ്യത്യസ്തമായ അധിനിവേശത്തോടുള്ള പൗരസമൂഹത്തിൻ്റെ ഭീതി,ഭരണീയതയുടെ സ്വാധീനം,അധീശത്വത്തിന് പൊതു ഇടവുമായുള്ള ബന്ധം എന്നിങ്ങനെ സാമ്യവ്യത്യാസങ്ങൾ ചർച്ച ചെയ്തുകൊണ്ട് ഉപസംഹരിക്കുന്നു.

ഡിജിറ്റൽകാല സാമൂഹികത: ചന്ദ്രമതി കഥകളിൽ (വെബ്സൈറ്റ്, ഇവിടെ ഒരു ടെക്കി, എന്നീ കഥകളുടെ വിശകലനം)

രേഷ്മ. കെ — 2024-12-30

'വെബ്സൈറ്റ്', 'ഇവിടെ ഒരു ടെക്കി' എന്നീ കഥകളെ മുൻനിർത്തി, ഡിജിറ്റൽ സാങ്കേതികവിദ്യയുടെ വളർച്ച മലയാള സമൂഹത്തിലും സാഹിത്യത്തിലും വരുത്തിയ മാറ്റങ്ങൾ ചന്ദ്രമതിയുടെ എഴുത്തിൽ എങ്ങനെ പ്രതിഫലിക്കുന്നു എന്ന് പരിശോധിക്കുന്നു. 90-കൾക്ക് ശേഷം സൈബർ ലോകം യാഥാർത്ഥ്യമായപ്പോൾ അതുണ്ടാക്കിയ സാംസ്കാരിക സംഘർഷങ്ങളും, മാറുന്ന മനുഷ്യബന്ധങ്ങളും, തൊഴിൽപരമായ ഉത്കണ്ഠകളും ചന്ദ്രമതിയുടെ കഥകൾ ആവിഷ്കരിക്കുന്നതായി പഠനം വിലയിരുത്തുന്നു. 'വെബ്സൈറ്റ്' എന്ന കഥ, ഇന്റർനെറ്റിലൂടെ രൂപപ്പെടുന്ന സൗഹൃദത്തിന്റെ സാധ്യതകളും അതിലെ യാഥാർത്ഥ്യവും മിഥ്യയും തമ്മിലുള്ള സംഘർഷവും ചർച്ചചെയ്യുമ്പോൾ, 'ഇവിടെ ഒരു ടെക്കി' എന്ന കഥ ഐ.ടി. മേഖലയിലെ തൊഴിൽപരമായ അരക്ഷിതാവസ്ഥയും മനുഷ്യനും യന്ത്രവും തമ്മിലുള്ള വൈകാരിക ബന്ധവും ഫലിത രൂപത്തിൽ അവതരിപ്പിക്കുന്നു. ഈ കഥകളിലൂടെ, സൈബർലോകത്തെ ഭാഷയും പ്രമേയങ്ങളും ഉപയോഗിച്ച് ചന്ദ്രമതി തന്റെ ആഖ്യാനരീതി നവീകരിക്കുകയും ഡിജിറ്റൽ കാലത്തെ ജീവിതത്തെ സൂക്ഷ്മമായി അടയാളപ്പെടുത്തുകയും ചെയ്യുന്നുവെന്ന് ലേഖനം സമർത്ഥിക്കുന്നു.